Vetëm tre muaj nga vrasja e Bledar Muçës në Belgjikë, policia e Elbasanit, ka rregjistruar një denoncim, të cilin më pas e ka referuar për vlerësim hetimor në prokurorinë e qytetit.
Bëhet fjalë për një përplasje verbale, që më pas ka agravuar në konflikt fizik mes familjarëve të dy miqve, Bledar Muçës, i ekzekutuar prej 23 janarit 2022 dhe Florenc Çapjas, i shpallur në kërkim nga gjykata e posaçme SPAK, si i dyshuar për vrasjen e Gentian dhe Nezir Beqirit në Gusht të vitit 2015.
Konflikti mes vëllait të Bledarit, Gentian Muçës, dhe Fejzulla Çapjas e nipit të tij Edis Xhika, është rregjistruar në 29 prill 2022 në lagjen “Emin Matraxhiu”.
Redaksia ka mësuar nga burime pranë policisë dhe prokurorisë Elbasan, se mes dy palëve tashmë ka ndodhur një krisje, për shkak të konfliktit për pronësinë dhe mënyrës së vendosjes së kamerave të sigurisë në shtëpinë e të ndjerit, Bledar Muça. Konflikti ka shkuar deri në dyert e policisë dhe prokurorisë së qytetit, ndërsa ka qënë Gentian Muça, ai që ka depozituar kallëzim kundër, Fejzulla Çapjas, dhe nipit të këtij të fundit, Edis Xhikës.
Në materialin e prokurorisë thuhet nga Gentian Muça, se shtëpia e tij si dhe vëllait të vrarë Bledar Muça, Fejzulla Çapja dhe të afërmve të tij janë afër me njëra-tjetrën.
“…dua të deklaroj se para 9 ditësh, Edis Xhika, i cili është nipi i Fejzullait, ka lëvizur drejtimin e një prej kamerave të banesës time si dhe ka hequr fishën e një kamere të banesës së vëllait. Sot rreth orës 19:00 unë kam shkuar te Edisi me qëllim për ta pyetur, çfarë ke me kamerat. S’qaroj se Edisi ndodhej te lokali, afër banesës. Unë kam parë që Edisi kishte një shkop Bejzbolli në dorë dhe më kërcënoi me fjalë. Ndërsa Fejzullahu, i cili ndodhej i ulur afër vendit ku ndodhej Edisi, është ngritur në këmbë duke më sharë dhe ofenduar me fjalë dhe më pas, më ka goditur me grushte në pjesën e qafës, duke vazhduar të më kërcënojë me fjalë, duke më thënë: “…ikë nga lagjia, do të bëj ashtu, do të bëj kështu…”. Në këto kushte menjëherë jam paraqitur në polici për të dhënë ankesën time. Unë kërkoj që Fejzulla Çapja dhe Edis Xhika, të më lenë rehat në hallet e mia, si dhe mos të merren me punët e mia. Kërkoj që Fejzullahu, të mbajë përgjegjësi për veprimin që më ka bërë….”-ka deklaruar Gentian Muça.
Por vetëm një ditë pas këtij denoncimi, sërisht Gentian Muça, është paraqitur dhe ka depozituar një denoncim të ri, në policinë e Elbasanit. Këtë herë vëllai i Bledar Muçës, ka shpjeguar se:
”…pasi mbarova ankimin në polici, kam shkuar dhe kam parë kamerat tek banesa e vëllait tim të ndjerë, Bledar Muçës, pasi aktualisht në këtë shtëpi jeton motra ime V.Muça. Aty konstatova që një nga kamerat e vendosura nga vëllai në një nga shtyllat e rrugës, e cila duket dhe në pamjet filmike,është thyer nga Edis Xhika, i cili vjen me një motor dhe në dorë ka një shkop që ngjason me atë të bejzbollit, i cili godet kameran me shkopin dhe këtë gjë e ka bërë në datën 29 prill 2022, disa orë para se në të konfliktoheshim dhe unë të vija në komisariat të bëja ankim për Fejzulla Çapjan…”.
Për të sqaruar situatën konfliktuale mes dy palëve, Çapja dhe Muça, policia ka thirur për të dëshmuar dhe Fejzulla Çapjan e nipin e tij, Edis Xhika.
Ky i fundit ka treguar në polici se:
“…rreth orës 19:00 të datës 29 Prill isha ulur tek lokali i dajës tim Fejza Çapja. Në një moment vjen me nxitim Gentian Muça me makinën e tij dhe pasi zbret nga makina, fillon dhe më kërkonte llogari për disa kamera jashtë murit rrethues të banesës së tij, që mendonte se unë i kisha lëvizur. Situata me komunikime agravoi në debat të nxehtë me fjalë mes dajës tim dhe me mua. Në një moment daja im ndërhyri, duke na hapur që të mos konfliktoheshim fizikisht dhe më pas Gentian Muça u largua…”.
Edis Xhika, ka treguar se në momentin e konfliktit me Muçën, nuk ka pasur asnjë shkop bejzbolli siç dhe pretendon në dëshminë e dhënë nga ana e Gentianit. Por i riu pranon se është ai personi që ka lëvizur një kamera, që sipas tij vëzhgon të gjithë pjesën e rrugës, ku ai dhe familja e tij kalojnë, dhe për arsye sigurie dhe privatësie, e ka lëvizur pa e dëmtuar.
Në pyetje është marë dhe Fejzulla Çapja,i cili ka shpjeguar se ka qënë prezent kur ka ndodhur konflikti në lokalin e tij.
Ai ka treguar se ka shërbyer për shuarjen e situatës së tensionuar mes nipit të tij, Edison Xhika dhe Gentian Muçës, duke puhuar se i ka ndarë të dyja palët. Çapja, më tej ka treguar se në asnjë moment nuk e ka goditur me grusht Gentian Muçën, por mund ta ketë kapur me dorë tek pjesa e qafës, me qëllim për ta larguar.
